Në Konferencën e Kryetarëve, të mbajtur në Kryesinë e Kuvendit më 29 janar 2026, u zhvilluan debate të forta mes deputetit Tedi Blushi, sekretar i përgjithshëm i Partisë së Lirisë, dhe kryeparlamentarit Niko Peleshi. Debati lidhej me mosmbajtjen e mbledhjes së Këshillit të Imuniteteve dhe moskalimin e kërkesës së SPAK-ut për heqjen e imunitetit parlamentar të zv.kryeministres Belinda Balluku.
Blushi akuzoi mazhorancën se po keqpërdor Kuvendin për të mbrojtur Ballukun, të cilën e cilësoi si zyrtare të përfshirë në vjedhje milionash. Ai theksoi standardin dyfish ligjor, ku qytetarët dënohen me burg për parkim të parregullt, ndërsa zyrtarë të lartë mbrohen për akuzat e rënda.
Në deklaratën e tij, Blushi tha: "Ju miratoni ligje për të dënuar me burg shqiptarët për parkim dysh dhe nuk dorëzonin para drejtësisë zv.kryeministren hajdute të kapur për vjedhje në flagrancë. Standardi që shqiptarët të bëjnë burg për parkimin dhe zv.kryeministrja të jetë e lirë për vjedhje është irrituese. Korrupsioni duhet të jetë vija e kuqe për Kuvendin."
Deputeti nënvizoi se imuniteti i Ballukut duhej hequr në mbledhjen e 28 janarit, sipas kalendarit, por mazhoranca e shtyu për të pritur vendimin e Gjykatës Kushtetuese mbi pezullimin nga detyra. Ai shtoi: "Imuniteti i duhej hequr dje, jo nesër. Boll e keqpërdoret Kuvendin për të mbrojtur korrupsionin e Edi Ramës. Dosja Balluku është dosja e Ramës, por Kuvendi nuk mund të kthehet në mburojë për hallet e tyre. Dorëzoni Ballukun dhe mos i provokoni shqiptarët."
Blushi paralajmëroi se kjo mund të çojë në revoltë qytetarësh.