Më 30 qershor, në Qipro do të nisë mbledhja e Bordit të Paqes për Gazën, strukturë e iniciuar nga administrata e Presidentit amerikan Donald Trump. Takimi ka për qëllim shqyrtimin e planeve për rindërtimin e infrastrukturës dhe vendosjen e një qeverisjeje në Rripin e Gazës, me punime që pritet të zgjasin ndërmjet dy dhe tre ditëve.
Në diskutime do të përfshihen përfaqësues të Komitetit Kombëtar për Administrimin e Gazës, grupim i përbërë nga teknokratë palestinezë, roli i të cilëve është marrja e përgjegjësive administrative pas përfundimit të ndikimit të Hamasit. Organizatorët kanë njoftuar se përzgjedhja e Qipros si vendtakim është bërë vetëm për arsye logjistike dhe shteti pritës nuk ka rol aktiv në vendimmarrjen politike.
Që nga krijimi i tij, Bordi i Paqes është përballur me sfida të shumta, përfshirë mungesën e burimeve financiare, vështirësitë logjistike dhe pikëpyetjet lidhur me legjitimitetin e tij ndërkombëtar. Ndërkohë, gjendja në terren mbetet tejet e rëndë. Konflikti i vazhdueshëm ka shkaktuar shkatërrime të mëdha, zhvendosjen masive të popullsisë dhe dhjetëra mijëra viktima.