Ministri i Mbrojtjes i Bullgarisë, Dimitar Stoyanov, njoftoi të martën se vendi nuk do të dërgojë më ndihmë ushtarake për Ukrainën. Sipas Stoyanov, konflikti aktual është shndërruar në një "luftë rraskapitëse", ku rritja e numrit të armëve vetëm sa shton humbjen e jetëve njerëzore.
"Ajo që po dëshmojmë është një luftë rraskapitëse dhe pavarësisht sa armë grumbullohen, rezultati i vetëm është humbja e jetëve njerëzore", u shpreh ministri, duke shtuar se ushtria ukrainase aktualisht ka mjaftueshëm armatime. Sipas tij, vendi nuk parashikon të furnizojë më armë, pasi nevojat e Ukrainës duhet të adresohen përmes negociatave diplomatike.
Ky vendim pasqyron qëndrimin e qeverisë së re të formuar pas zgjedhjeve të prillit, e cila udhëhiqet nga kryeministri Rumen Radev. Ky i fundit prej vitesh ka kundërshtuar armatosjen e Ukrainës, duke bërë thirrje për përpjekje të shtuara diplomatike.
Që nga fillimi i pushtimit rus në vitin 2022, Bullgaria ka kontribuar me dërgesa të ndryshme ushtarake, kryesisht të epokës sovjetike. Për shkak të polemikave politike të brendshme, dërgesat janë realizuar shpesh përmes vendeve të treta. Ndonëse Bullgaria nuk ka qenë ndër furnizuesit kryesorë të Ukrainës, ky njoftim shënon një ndryshim thelbësor në politikën e jashtme dhe të mbrojtjes së shtetit ballkanik.
Përditësime
Ministri bullgar i Mbrojtjes, Atanas Stojanov, deklaroi për Sky News se Ukraina ka nevojë për më shumë trupa sesa për dërgesa shtesë armatimi. Ky qëndrim përputhet me vendimin e Bullgarisë për të ndaluar zyrtarisht ndihmën ushtarake drejt Ukrainës.