Deputeti i zgjedhur i Aleancës për Ardhmërinë e Kosovës (AAK), Burim Ramadani, ka kërkuar zyrtarisht largimin e pranisë statike të misionit paqeruajtës të NATO-s, KFOR, nga ura kryesore mbi lumin Ibër në qytetin e Mitrovicës. Përmes një postimi në rrjetet sociale, Ramadani argumenton se është momenti që kjo prani të rishikohet, pasi rrethanat e sigurisë kanë ndryshuar.
Sipas Ramadanit, ura e Mitrovicës duhet të shndërrohet në një simbol të mirëbesimit dhe normalizimit, duke lënë pas rolin e saj si pikë tensioni. Ai theksoi se kjo kërkesë nuk duhet të interpretohet si dobësim i sigurisë, por përkundrazi, si një dëshmi se siguria në vend është forcuar. Ai vlerësoi se kushtet janë përmbushur dhe se sistemi i sigurisë duhet të mbështetet tek institucionet vendore përmes patrullimeve aktive, monitorimit dhe reagimit të shpejtë, në vend të qëndrimit statik të forcave ndërkombëtare.
"Ka ardhur momenti që prania statike e KFOR-it në urën kryesore të Mitrovicës të largohet. Jo si dobësim i sigurisë, por si hap përpara. Sepse, kushtet janë përmbushur", ka shkruar Ramadani.
Ai nënvizoi se siguria e qëndrueshme ndërtohet kur qytetarët fitojnë besim dhe kur masat e jashtëzakonshme të periudhave të kaluara zëvendësohen me normalitetin e sundimit të ligjit. Ky qëndrim i deputetit vjen në një moment kur po kërkohet një qasje e re për menaxhimin e situatës në veri të vendit, duke marrë parasysh përparimet e fundit në fushën e sigurisë dhe nevojën për të kaluar nga gjendjet e jashtëzakonshme drejt funksionimit të plotë institucional.
Përditësime
Ish-zëvendësministri i Mbrojtjes, Burim Ramadani, ka renditur gjashtë argumente profesionale në favor të largimit të forcave statike të KFOR-it nga ura e Mitrovicës. Sipas tij, misionet paqeruajtëse duhet t'i rialokojnë burimet aty ku nevoja operative është më e madhe, duke vlerësuar se prezenca e vazhdueshme statike nuk është më e domosdoshme për sigurinë e kësaj zone.