Ministri në detyrë i Financave, Hekuran Murati, njoftoi se përmes Qarkores së Dytë Buxhetore, të lëshuar javën e kaluar, janë përcaktuar kufijtë buxhetorë për secilën komunë. Sipas Muratit, performanca e lartë e të hyrave buxhetore gjatë viteve të fundit ka krijuar hapësirën e nevojshme fiskale për të rritur fondet për pushtetin lokal. Buxheti i planifikuar për komunat parashikohet të shkojë në 907 milionë euro në vitin 2027, një rritje krahasuar me 546 milionë eurot që ishin në vitin 2021.
Njoftimi pason reagimet e kryetarëve të komunave, të cilët kanë paralajmëruar organizimin e një proteste para ndërtesës së Qeverisë në muajin shtator. Kryetari i Prishtinës, Përparim Rama, ka shprehur kritika ndaj ekzekutivit, duke pretenduar se janë bllokuar mjete dhe janë penguar projekte komunale. Sipas Ramës, komunave u janë marrë mbi 344 milionë euro që nga viti 2022 për shkak të obligimeve të jashtme, qasje të cilën ai e ka cilësuar si diskriminuese ndaj komunave që nuk udhëhiqen nga partia në pushtet.
Nga ana tjetër, ministri Murati ka theksuar se rritja e buxhetit dëshmon përkushtimin për mbështetjen e vazhdueshme të nivelit lokal, duke shtuar se performanca fiskale ka qenë vendimtare për këtë shtim të fondeve.