Deputeti i Partisë Demokratike, Oerd Bylykbashi, foli në studion e News24 për reformën zgjedhore dhe territoriale, duke i lidhur me funksionimin e shtetit në Shqipëri.
Ai theksoi se reformat nuk mund të trajtohen të izoluara nga realiteti politik aktual. "Situata që përcakton reformën zgjedhore dhe territoriale varet nga zhvillimet në funksionimin e shtetit. Nuk mund të flasim për reforma të izoluara nga ajo që po ndodh sot në Shqipëri", u shpreh Bylykbashi.
Bylykbashi kritikoi mungesën e dialogut me mazhorancën Partinë Socialiste. Ai mori si shembull procesin e zgjedhjes së Avokatit të Popullit, ku Partia Demokratike kishte anuluar firmat e saj, por kryeministri Edi Rama i përdori ato. "Një konsensus me dyer të mbyllura mund të jetë i mirë, por edhe i keq. Dialog real nuk ka pasur. Mënyra si u përzgjodh Avokati i Popullit e tregoi këtë", tha ai.
Sa i përket reformës zgjedhore, deputeti i PD-së nënvizoi nevojën për rregulla të reja, për të parandaluar kapjen e shtetit. "Është shkatërruar raporti i partisë në pushtet me shtetin dhe me këtë vdes çdo proces zgjedhor. Ky është edhe shqetësimi kryesor i ODIHR. Na duhen rregulla të reja", deklaroi Bylykbashi.
Në përfundim, ai u shpreh se sistemi aktual zgjedhor duhet të ndryshojë rrënjësisht. "Ky sistem duhet të zhduket. Opozita përfiton, Rama humb, por dikush duhet të humbasë. Kjo nuk ka rëndësi, rëndësi ka ndërtimi i një procesi të drejtë zgjedhor", përfundoi ai.
Bylykbashi foli edhe për strategjinë e opozitës në lidhje me protestën e parashikuar më 10 shkurt dhe çështjet e tjera politike.