Ndërtimi i bypass-it të Shëngjinit po përparon me synim lehtësimin e qarkullimit dhe rritjen e aksesit drejt zonave bregdetare të veriut të vendit. Kryeministri Edi Rama ka ndarë pamje nga kantieri i punës, duke e vlerësuar këtë infrastrukturë si një investim kyç për zhvillimin ekonomik dhe turistik të zonës.
Sipas të dhënave teknike, rruga ka një gjatësi prej 8,1 kilometrash dhe ndërtohet përgjatë shpatit të Malit të Rrencit. Projekti parashikon shmangien e trafikut në qendër të Shëngjinit dhe krijimin e një lidhjeje panoramike që do të bashkojë Shëngjinin me Ranën e Hedhun dhe do të vijojë drejt Velipojës.
Punimet po zhvillohen njëkohësisht në të dy kahet e trasesë, nën financimin e Fondit Shqiptar të Zhvillimit. Ky aks pritet të jetë funksional brenda muajit shkurt 2027, duke u kthyer në një ndër segmentet kryesore për menaxhimin e fluksit të automjeteve gjatë sezonit veror.