Eugen Cakolli nga KDI (Instituti i Kosovës për Drejtësi) ka bërë të ditur se në zgjedhjet e 28 dhjetorit në Kosovë, rinumërimi i mbi 50% të vendvotimeve në QNR (Qendra e Numërimit dhe Rezultateve) ka zbuluar rreth 80 mijë vota të kandidatëve për deputetë të pasakta dhe të numëruara gabimisht në Qendrat Komunale të Numërimit.
Në Kosovë u numëruan rreth 900 mijë vota të vlefshme për subjektet politike. Për shkak të votës preferenciale deri në 10 kandidatë, numri total i votave për kandidatë arriti në rreth 6.8 milionë, pra mesatarisht çdo votues shënoi rreth 7 kandidatë në fletëvotim.
Prej 80 mijë votave të afektuara:
- 47.619 vota u hoqën nga kandidatët, pasi u ishin shtuar gabimisht gjatë numërimit fillestar;
- 32.018 vota u shtuan kandidatëve, pasi u ishin hequr në mënyrë të parregullt më herët.
Shpërndarja sipas subjekteve politike:
- Afërsisht 40 mijë vota për kandidatë të PDK-së;
- Rreth 15 mijë për LVV;
- Rreth 11 mijë për LDK;
- Rreth 4 mijë për AAK.
Mbi 80% e këtyre votave vijnë nga komuna e Prizrenit, ndërsa renditen më pas Malisheva dhe Podujeva, e cila është rinumëruar vetëm pjesërisht (rreth 10%).
Cakolli thekson se rritja e numrit të votave preferenciale deri në 10 kandidatë, së bashku me centralizimin e numërimit në Qendrat Komunale, e ka bërë procesin më të cenueshëm ndaj abuzimeve. Të dhënat përpunohen nga një numër i vogël personash, që në disa raste janë familjarë ose të afërm të kandidatëve, çka mund të prodhojë devijime të mëdha në rezultate.