Agjencia Telegrafike Shqiptare (ATSH) në bashkëpunim me Drejtorinë e Përgjithshme të Arkivave (DPA) çeli ekspozitën fotografike dhe dokumentare „ATSH – Një rrugëtim në historinë e lajmit shqiptar“ në mjediset e Kalasë së Tiranës më 9 maj, në Ditën e Europës.
Ekspozita paraqet një panoramë të plotë të historisë së informacionit në Shqipëri, nga format e para të transmetimit në vitet '20, radiostacionet dhe gazetaria tradicionale, deri në epokën digjitale. Ajo dokumenton transformimin e lajmit si mjet komunikimi publik, instrument institucional dhe pjesë e kujtesës kombëtare, duke përfshirë materiale arkivore të papublikuara më parë, si marrëveshje me agjenci ndërkombëtare, ligji i shtypit i vitit 1931, dokumente nga periudha lufte dhe fotografi të gazetarëve në terren.
ATSH disponon një arkiv me mbi 300 mijë fotografi dhe negativë filmikë që datojnë nga viti 1913. Procesi i digjitalizimit po vazhdon, ndërsa ekspozita shërben si homazh për punonjësit e agjencisë, nga Mihal Sherko dhe drejtuesit e parë, deri te gazetarët, fotoreporterët dhe arkivistët.
Deklaratat e zyrtarëve
Zëvendëskryeministrja Albana Koçiu vlerësoi nismën si ndërthurje të historisë me reflektimin mbi të ardhmen e informacionit, në një kohë sfidash nga dezinformimi dhe teknologjia. Ajo theksoi se liria e medias dhe vërtetësia e informacionit janë vlera europiane themelore. Sipas Eurobarometrit, 73% e qytetarëve e perceptojnë dezinformimin si rrezik të përditshëm dhe 86% si kërcënim për demokracinë.
Drejtoresha e përgjithshme e ATSH-së, Valbona Zhupa, nënvizoi se ekspozita rikthen atmosferën e epokave të ndryshme dhe rolin e agjencisë në ndërtimin e informacionit publik. Ajo përmendi arkivat si pjesë të memories kolektive.
Drejtori i përgjithshëm i DPA-së, Endrit Musai, theksoi se arkivat dhe media ruajnë kujtesën e kombit, ndërsa ekspozita është faza e parë e bashkëpunimit mes institucioneve.
Në ceremoni morën pjesë gjithashtu kryetarja e Autoritetit të Mediave Audiovizive, Armela Krasniqi, dhe historiani Afrim Krasniqi, së bashku me profesionistë të medias.