Është çelur në Madrid Panairi Ndërkombëtar i Turizmit FITUR, një nga ngjarjet kryesore globale për industrinë e turizmit. Shqipëria prezantohet me stendën zyrtare, duke u pozicionuar si destinacion gjithëvjetor dhe gjithëpërfshirës përmes përvojave autentike.
Ministri i Turizmit dhe Kulturës, Blendi Gonxhja, deklaroi se pavijoni shqiptar është konceptuar nën moton “Albania All Senses”, me pjesëmarrjen e agjencive turistike, partnerëve, shoqatave, përfaqësuesve të bashkive si dhe strukturave që promovojnë turizmin, kulturën, traditën, folklonin dhe artizanatin shqiptar.
“Çelim pavijonin e Shqipërisë me ‘Albania All Senses’, me një numër të konsiderueshëm agjencish dhe partnerësh. Turizmi nuk është vetëm det, çadra dhe rëra. Kemi nevojë për turizëm eventesh, destinacionesh, spektaklesh dhe aktivitetesh të ndryshme”, u shpreh ministri Gonxhja.
Ai theksoi rolin e Agjencisë Kombëtare të Turizmit dhe Agjencisë së Bregdetit në menaxhimin dhe promovimin e Shqipërisë. Gjithashtu, nënvizoi rëndësinë e promovimit digjital dhe virtual për zgjerimin e turizmit gjithëvjetor, duke përfshirë turizmin dimëror, të konferencave dhe retreat-esh.
Ministri vuri në dukje nevojën për rritjen e kapaciteteve hoteliere gjatë dimrit dhe investime të qëndrueshme gjatë gjithë vitit, për të mbështetur promovimin e turizmit shqiptar.
Panairi ofron mundësi për takime biznesi dhe bashkëpunime në nivele qeveritare, lokale e ndërkombëtare, duke forcuar rrjetëzimin dhe njohjen e Shqipërisë në tregjet globale. Dy ditët e para kushtohen takimeve profesionale, negociatave dhe kontratave, ndërsa fundjava është e hapur për publikun e gjerë.
Përditësime
Kryeministri Edi Rama deklaroi se Shqipëria po pozicionohet si destinacion gjithëvjetor përmes përvojave autentike.
Gonxhja shtoi: "Do të punojmë fort për promovim dixhital dhe virtual."
Sipas të dhënave të reja nga stenda shqiptare në FITUR Madrid, rreth 10% e turizmit është i planifikuar me rezervime.