Analistët jopartiakë në Shtetet e Bashkuara vlerësojnë se demokratët kanë shanse të mira të fitojnë kontrollin e Dhomës së Përfaqësuesve dhe, ndoshta, edhe të Senatit në zgjedhjet e mesmandatit, që mbahen më 3 nëntor. Një fitore do t’u jepte atyre një pjesë të pushtetit në Uashington, pas dy vjetësh kontrolli republikan.
Presidenti Donald Trump e nisi luftën me Iranin më 28 shkurt, pa marrë më parë miratimin e Kongresit. Demokratët kanë votuar vazhdimisht për t’u dhënë fund luftimeve. Nëse marrin kontrollin e Dhomës së Përfaqësuesve ose të Senatit, ata mund të shkurtojnë shpenzimet e mbrojtjes për t’i bërë presion Trumpit që të kërkojë miratimin e Kongresit për vazhdimin e luftës. Gjithashtu, mund t’u kërkojnë zyrtarëve të administratës të dëshmojnë publikisht për planet e tyre.
Ukraina dhe Izraeli
Një fitore demokrate mund t’i japë shtysë të re mbështetjes për Ukrainën. Trumpi e ka ndërprerë kryesisht ndihmën e drejtpërdrejtë financiare dhe ushtarake të Shteteve të Bashkuara për vendin, ndërsa ligjvënës demokratë dhe republikanë kanë shprehur mbështetje për Ukrainën, e cila përballet me pushtimin rus.
Mbështetja për Izraelin ka rënë ndjeshëm mes demokratëve, për shkak të mënyrës se si është zhvilluar lufta në Gazë, ku janë vrarë dhjetëra mijëra civilë palestinezë. Ndër faktorët e përmendur është edhe dhuna e vazhdueshme në Bregun Perëndimor të pushtuar nga Izraeli. Demokratët mund ta kufizojnë ose ta ndërpresin ndihmën ushtarake për Izraelin, e cila arriti në 3.8 miliardë dollarë në vitin më të fundit fiskal. Kjo shumë ishte më e lartë se ndihma e dhënë për cilindo vend tjetër.
Buxheti i mbrojtjes
Trumpi kërkoi këtë vit një rritje të paprecedentë prej 67 për qind të buxhetit ushtarak, duke e çuar atë në 1.5 trilion dollarë. Demokratët e bllokuan kërkesën në Senat, duke përmendur mungesën e konsultimit me Kongresin për luftën me Iranin dhe shkurtimet e mëdha të programeve sociale.