Klubi anglez Chelsea FC ka njoftuar sot zyrtarisht ndërprerjen e bashkëpunimit me trajnerin e parë Liam Rosenior. Ky vendim erdhi menjëherë pas humbjes 3-0 ndaj Brighton & Hove Albion në Premier League, që shënoi humbjen e pestë radhazi të klubit pa arritur të shënojë gol, ecurinë më të dobët në 114 vitet e fundit.
Në komunikatën zyrtare, drejtuesit e Chelsea-s falënderuan Rosenior-in dhe stafin e tij për kontributin, profesionalizmin dhe integritetin e treguar që nga emërimi i tij në mes të sezonit, vetëm tre muaj e gjysmë më parë si pasues i Enzo Maresca-s. Kontrata e Rosenior-it ishte e vlefshme deri në vitin 2032.
Klubi theksoi se vendimi nuk ka qenë i lehtë, por rezultatet dhe paraqitjet e fundit kanë qenë nën standardet e kërkuara, në një moment kur sezoni mbetet i hapur me objektiva të rëndësishme si sigurimi i një vendi në garat evropiane dhe avancimi në FA Cup.
Calum McFarlane do të marrë drejtimin e skuadrës si trajner i përkohshëm deri në fund të sezonit, i mbështetur nga stafi aktual. Klubi ka bërë të ditur se do të nisë një proces analize për të vendosur për trajnerin afatgjatë, me qëllim rikthimin e stabilitetit në ekip.
Përditësime
Chelsea ka pësuar 7 humbje në 8 ndeshjet e fundit, përveç fitores ndaj Port Vale.
- Liam Rosenior është trajneri i 4-të i shkarkuar nën Todd Boehly në 2 vjet.
- Klubi emëron Calum McFarlane si trajner të ekipit U21.
Chelsea ndodhet 7 pikë larg zonës së Champions League-it në Premier League.