Christian Schmidt mori vendim personal për të dhënë fund shërbimit si përfaqësues i lartë ndërkombëtar në Bosnje dhe Hercegovinë, njoftoi Zyra e Përfaqësuesit të Lartë (OHR) më 11 maj.
Sipas njoftimit, Schmidt e informoi për këtë Bordin Drejtues të Këshillit për Zbatimin e Paqes (PIC) dhe kërkoi nisjen e procesit për emërimin e pasardhësit. Ai theksoi se do të vazhdojë të kryejë detyrën gjatë këtij procesi, duke nënvizuar se “komuniteti i bashkuar ndërkombëtar mbetet i pazëvendësueshëm për stabilitetin e Bosnje dhe Hercegovinës dhe për përparimin e saj drejt aspiratave euroatlantike”.
Schmidt u bëri thirrje qytetarëve dhe liderëve politikë nga të dy entitetet dhe të gjitha nivelet e pushtetit të intensifikojnë përpjekjet, për të punuar së bashku me pasardhësin e tij në zbatimin e reformave dhe arritjen e përparimit kyç drejt integrimeve euroatlantike.
Roli i përfaqësuesit të lartë
Përfaqësuesi i lartë ka detyrën të mbikëqyrë zbatimin e Marrëveshjes së Dejtonit për Paqe dhe të sigurojë funksionimin e institucioneve shtetërore sipas saj. Funksioni me status misioni diplomatik u krijua në përputhje me Marrëveshjen e Përgjithshme Kornizë për Paqe në Bosnje dhe Hercegovinë.
Biografia e Schmidt
Qeveria federale e Gjermanisë konfirmoi kandidaturën e tij zyrtare në mes të janarit 2021. Ai e pasoi Valentin Inzkon, diplomatin austriak të emëruar në krye të OHR-së në vitin 2009.
Schmidt është politikan i Unionit Kristian-Social (CSU) dhe ish-ministër i Bujqësisë i Gjermanisë. Ai ka shërbyer si deputet në Parlamentin federal të Gjermanisë, i angazhuar veçanërisht në çështje të politikës së jashtme.