Një cisternë me 40 mijë tonë naftë ruse është nisur drejt Nju Jorkut, në atë që pritet të jetë dërgesa e parë e këtij lloji drejt Shteteve të Bashkuara që nga viti 2022. Anija Agioi Fanendes, e cila lundron nën flamurin e Maltës, u ngarkua më 22 tetor në portin rus të Primorskut, në Detin Baltik, dhe pritet të mbërrijë në SHBA më 7 nëntor, sipas të dhënave të transportit detar.
Ngarkesa përbëhet nga naftë me përmbajtje shumë të ulët squfuri. Identiteti i blerësit dhe i shitësit nuk është bërë i ditur. Importet amerikane të naftës dhe produkteve të naftës nga Rusia u ndaluan në vitin 2022, gjatë administratës së ish-presidentit Joe Biden, pas nisjes së luftës së Rusisë në Ukrainë.
Marrëveshja mes presidentit amerikan Donald Trump dhe presidentit rus Vladimir Putin u njoftua këtë muaj, në kuadër të përpjekjeve për të ulur çmimet e larta të naftës përpara zgjedhjeve të mesmandatit në SHBA, të planifikuara për 3 nëntor. Si pjesë e marrëveshjes, Trumpi pezulloi zbatimin e disa dispozitave të një ligji të ri amerikan për sanksionet ndaj Rusisë. Ai gjithashtu kërcënoi vendet evropiane me kufizimin e eksporteve amerikane të naftës nëse ato nuk nxjerrin në treg më shumë karburant nga rezervat e tyre të emergjencës, me synimin për të ulur çmimet.
Më 9 tetor, Trumpi deklaroi se Rusia do të eksportonte menjëherë 300 mijë tonë naftë, ose rreth 2,25 milionë fuçi, drejt SHBA-së dhe tregjeve ndërkombëtare. Sipas planit të bërë publik, në nëntor do të dërgoheshin edhe 500 mijë tonë, ndërsa më pas do të pasonte një dërgesë tjetër prej një milion tonësh.
Zëdhënësi i Kremlinit, Dmitry Peskov, konfirmoi se anija e parë në kuadër të marrëveshjes ishte nisur drejt blerësve, por nuk saktësoi nëse destinacioni i saj ishte SHBA-ja apo një treg tjetër. Marrëveshja përfshin edhe heqjen e ndalimit që Rusia kishte vendosur për eksportet e naftës.
Pas embargos së Bashkimit Evropian ndaj importeve të produkteve të naftës ruse, të vendosur në shkurt të vitit 2023, Rusia i ka orientuar eksportet kryesisht drejt Turqisë, Brazilit dhe vendeve afrikane. Ajo furnizon gjithashtu vendet e Azisë Qendrore përmes transportit hekurudhor. Të dhënat e publikuara këtë javë tregojnë se, pas heqjes së kufizimeve nga Moska, cisternat ruse po rifillojnë dërgesat drejt tregjeve tradicionale. Të paktën dy anije kanë sinjalizuar se po lundrojnë drejt Turqisë dhe Brazilit, ndërsa destinacionet e disa ngarkesave të tjera mbeten të paqarta.
Zëvendëskryeministri rus Alexander Novak deklaroi se dërgesat drejt SHBA-së do të vazhdojnë, ndërsa kompanitë e të dy vendeve po përpiqen të zgjidhin çështjet kontraktuale dhe të pagesave. Sipas tij, Rusia mund t’i rikthejë eksportet e naftës në nivelet e zakonshme prej 3 deri në 3,5 milionë tonësh në muaj deri në fund të vitit. I dërguari i presidentit rus Vladimir Putin, Kirill Dmitriev, tha javën e kaluar se Departamenti amerikan i Thesarit i kishte kërkuar fondit sovran rus, të cilin ai drejton, të ndihmonte në zgjidhjen e problemeve të pagesave që lidhen me marrëveshjen.