Nesër, me fillim nga ora 11:00, në hapësirat e Kuvendit të Kosovës zhvillohet takimi mes kryeministrit Albin Kurti dhe kryetarit të LDK-së, Lumir Abdixhiku, për çështjen e zgjedhjes së Presidentit të vendit. Ky është takimi i dytë brenda një periudhe të shkurtër mes kreut të VV-së dhe Abdixhikut.
Sekretarja e PDK-së, Vlora Çitaku, konfirmoi për Klankosova.tv se partia e saj nuk ka marrë ftesë zyrtare nga kryeministri për takim. Ajo tha se PDK-ja ka kërkuar një shkresë zyrtare dhe jo ftesë nëpërmjet kanaleve të WhatsApp-it. "Ne kemi kërkuar që ai të dërgojë një shkresë zyrtare dhe jo të na ftojë nëpër kanale të WhatsApp-it. Përveç emrave, ne kemi kërkuar që para së gjithash të takohemi për parimet", deklaroi deputetja.
Pas mbledhjes së Kryesisë këtë javë, Çitaku theksoi se zgjedhja e presidentit është moment i rëndësishëm për demokracinë parlamentare. "Parlamenti i Kosovës ka 120 deputetë, ndërsa PDK-ja ka 22 të tillë. Nëse shumica parlamentare është e interesuar për të zgjedhur presidentin, nuk e ka opsion vetëm bashkëbisedimin me PDK-në, por ka edhe mundësi të tjera", shtoi nënkryetarja e Kuvendit.
Kosova ka hyrë në dhjetëditëshin e fundit për zgjedhjen e presidentit, me 28 prillin si afat të fundit të përcaktuar nga Gjykata Kushtetuese.