Sekretarja e Përgjithshme e PDK-së, Vlora Çitaku, në emisionin Rubikon, ka kritikuar institucionet e Kosovës për mënyrën e trajtimit të çështjes së ish-krerëve të UÇK-së që po përballen me procesin gjyqësor në Hagë. Sipas saj, mbështetja shtetërore ka qenë kryesisht financiare dhe e pamjaftueshme për të mbuluar shpenzimet e mbrojtjes, duke theksuar mungesën e angazhimit politik dhe diplomatik.
Çitaku vlerësoi kontributin e kryeministrit të Shqipërisë, Edi Rama, duke u shprehur se ai ka marrë mbi vete barrën që i takonte qeverisë së Kosovës. Ajo përmendi dëshminë vullnetare të ish-komandantit të NATO-s, Wesley Clark, si një shembull angazhimi që kontraston me heshtjen e kryeministrit Albin Kurti dhe ministres së Drejtësisë, për të cilët tha se në disa raste kanë pasur deklarata të ngjashme me Prokurorinë.
Në lidhje me zhvillimet pas zgjedhjeve parlamentare të 7 qershorit, Çitaku komentoi takimin ndërmjet Bedri Hamzës dhe Albin Kurtit, duke theksuar se ai nuk ka prodhuar asnjë rezultat konkret. Sipas saj, nuk ka pasur hapësirë për diskutime thelbësore, pasi kryeministri Kurti e ka reduktuar agjendën në negociata për poste.
"Është tmerruese se si synohet të reduktohet çështja e zgjedhjes së presidentit në një vend pune. Ne nuk kemi shkuar për të negociuar poste, por për të diskutuar parimet e qeverisjes së katër viteve të ardhshme", deklaroi Çitaku, duke shtuar se oferta e Kurtit ka qenë: "Qeverinë e bëj vetë, Kuvendin e bëj vetë, po hajde ta bëjmë presidentin".