Bill dhe Hillary Clinton shprehën ngushëllime për familjen dhe të afërmit e Osman Osmanit, njërit prej themeluesve të lobit shqiptar në Amerikë. Në një letër, çifti e kujtoi Osmanin si mikun dhe fqinjin e tyre që nga viti 1999.
Në letër, Clintonët thanë se e takuan Osmanin dhe familjen e tij jashtë shtëpisë së tij në Chappaqua, Nju Jork, përballë banesës që sapo kishin blerë. Sipas tyre, bujaria e tij u duk që në takimin e parë, kur Osmani i prezantoi me një familje refugjatësh nga Kosova, e cila po qëndronte në shtëpinë e tij.
Çifti shprehu mirënjohje për miqësinë, mikpritjen dhe humorin e Osmanit. Në mesazhin e ngushëllimit, ata thanë se mendimet dhe lutjet e tyre ishin me fëmijët e tij, familjen, miqtë dhe të gjithë ata që e kishin njohur.
Rrëfimi i Osmanit për njohjen me Clintonin
Koha.net rikujtoi edhe një bisedë të Osmanit në podcastin PIKË, më 22 qershor 2025, ku ai tregoi se si u bë fqinj me Bill Clintonin. Osmani tha se Clinton kishte blerë shtëpi pranë banesës së tij dhe kishte ardhur vetë për ta takuar.
Sipas rrëfimit të Osmanit, biseda e parë mes tyre ishte e ngrohtë. Ai kujtoi se Clinton i kishte thënë: “Unë Kosovën e kam çliruar – unë i kam kthyer kosovarët në shtëpi”.