Zbatimi i marrëveshjes mes Shqipërisë dhe Francës për zhvillimin e cilësisë në turizëm ka nisur në fillim të këtij viti, rreth dy vite pas nënshkrimit të saj. Synimi është përmirësimi i shërbimeve për turistët e huaj dhe rritja e të ardhurave për buxhetin e shtetit.
Kujtim Dervishaj, kreu i Shoqatës së Restoranteve dhe Bujtinave, deklaroi se është lidhur kontratë me një shoqëri franceze, e cila tashmë është akomoduar në Shqipëri. Kjo shoqëri do të punojë me hotelet 4 dhe 5 yje për të rritur cilësinë e shërbimit dhe për të futur në kulinari standardet e yjeve Michelin. Sot do të shkojnë në qytetin e Durrësit bashkë me agjencinë franceze për të nisur punën me hotelet.
Paralelisht me përmirësimin e cilësisë, synohet rritja e çmimit të netëqëndrimeve për t'i afruar ato me nivelet e vendeve të rajonit, si Mali i Zi, Kroacia dhe Greqia. Dervishaj theksoi se agjencia franceze do të sjellë turistë të nivelit të lartë dhe se nuk do të ketë më dhoma hoteli me çmime shumë të ulëta. Ai shtoi se çmimet te fqinjët janë dyfish më të larta dhe se Shqipëria nuk ka nevojë për 12 milionë turistë, por edhe 10 milionë të cilësisë së lartë janë të mjaftueshëm.
Sipas të dhënave të Bankës së Shqipërisë, një turist ka shpenzuar mesatarisht rreth 440 euro vitin e kaluar, shifër e ulët krahasuar me vendet e rajonit.