Superylli portugez, Cristiano Ronaldo, ka shënuar golin e radhës në karrierën e tij gjatë përballjes së Al Nassr ndaj Al-Taawoun, e vlefshme për xhiron e katërt të elitës së futbollit arab. Takimi përfundoi me fitoren 2-1 të skuadrës së Ronaldos, e cila përmbysi disavantazhin e shkaktuar që në minutën e 11. Barazimin për Al Nassr e realizoi Samu Costa në kohën shtesë të pjesës së parë, ndërsa goli i fitores erdhi në minutën e 50.
Ngjarja ka tërhequr vëmendje për shkak të dinamikës së realizimit. Mbrojtësi francez Mohamed Simakan goditi drejt portës dhe topi ishte duke shkuar në rrjetë, por Ronaldo e preku atë pak para se të kalonte vijën fatale. Si pasojë, goli u regjistrua zyrtarisht në emër të portugezit, duke shkaktuar zhgënjim te Simakan, i cili u largua nga zona e festimeve pas golit. Për 41-vjeçarin, ky ishte goli i dytë në këtë edicion.
Mediat raportojnë se ky realizim e çon Ronaldon në kuotën e 978 golave në karrierë, duke e afruar atë me shifrën historike prej 1,000 golash. Sipas raportimeve, ky gol e bën atë gjithashtu golashënuesin më të mirë në historinë e Al Nassr me 104 gola të shënuar për klubin saudit.
Përditësime
Al Nassr vazhdon dominimin në Saudi Pro League duke kryesuar renditjen me 12 pikë pas katër javësh të luajtura. Skuadra ka regjistruar gol në 91 ndeshje radhazi dhe ndodhet vetëm 6 ndeshje larg rekordit botëror. Ndërkohë, goli i 104-t i Cristiano Ronaldos me klubin saudit është zyrtarizuar si rekord i ri për ligën, duke tejkaluar shifrën e mëparshme të Mohammad Al Sahlawi-t.