Kombëtarja shqiptare rikthehet në stadiumin Air Albania gjatë muajit qershor për dy ndeshje miqësore. Kuqezinjtë do të përballen fillimisht me Izraelin më 3 qershor në orën 20:00, ndërsa më 6 qershor, po në orën 20:00, do të sfidojnë Luksemburgun.
Federata Shqiptare e Futbollit njoftoi se biletat për të dyja ndeshjet janë tashmë në shitje. Tifozët mund t'i sigurojnë ato online nëpërmjet platformës ebileta.al, të shpërndara nga kompania T-Ticket, si edhe pranë pikës fizike të shitjes në stadium.
Për të blerë biletën online, tifozët duhet të regjistrohen në platformë me një adresë elektronike. Më pas zgjidhet tribuna dhe ulësja përkatëse. Pas përzgjedhjes së vendeve, plotësohen të dhënat personale si emri, mbiemri dhe adresa elektronike. Në fund kryhet pagesa me kartë bankare dhe bileta dërgohet automatikisht në adresën e e-mailit të regjistruar.
Dy ndeshjet miqësore do të shërbejnë si përgatitje për angazhimet e ardhshme të kombëtares.