Klubi basketbollistik Go+Peja ka njoftuar se kapiteni i skuadrës, Dardan Berisha, ka pësuar lëndim dhe do të jetë jashtë fushave për një kohë të pacaktuar. Njoftimi zyrtar u bë të hënën, 12 janar 2026, përmes rrjeteve sociale.
Skuadra verdhezi i ka uruar Berishës rikuperim të shpejtë dhe rikthim sa më të hershëm në parket. Mungesa e tij paraqet humbje të madhe për ekipin në këtë fazë të sezonit, ku Berisha ka qenë lojtar stabil dhe lider i padiskutueshëm. Ai ka dhënë kontribut të vazhdueshëm në të dyja fazat e lojës gjatë këtij edicioni.
Berisha, i shpallur basketbollisti më i mirë në Kosovë për vitin 2025, nuk u paraqit në ndeshjen e së dielës mbrëma kundër Vëllaznimit të Gjakovës, të vlefshme për xhiron e 14-të të kampionatit. Go+Peja humbi atë takim me rezultat 94:85.
Sipas informatave jozyrtare nga gazetarja Ulpiana Emra e Klan Kosovës, Berisha pritet të mungojë rreth gjashtë javë. Ndërsa, një incident i ndodhur të enjten e kaluar në ndeshjen kundër Bashkimit, ku Berisha u qëllua pas hedhjeve të gjësendeve nga shikuesit dhe pati të çarë në ballë, mund të ketë lidhje me lëndimin e tij.