Dashamir Shehi, kryetar i LZHK-së, në emisionin „Off the Record” me moderatore Andrea Danglli në A2CNN, deklaroi se Partia Demokratike është në tendencë rënie.
Ai vlerësoi se në grupin opozitar Partia Demokratike është partia më e madhe, por e pamjaftueshme për të fituar zgjedhjet. "Me zotin Basha morëm 650 000 vota. Me zotin Berisha kanë marrë 480 000 vota. Tregon që tendenca e ngritjes, vektori pozitiv brenda opozitës, është te këto grupet e reja, te kjo lloj alternative", tha Shehi.
Sipas tij, Partia Demokratike nuk është më zgjidhja kryesore. "Nëse PD-ja është e zonja vetë, e marrin vetë në dorë këtë punë. S’ka nevojë fare për ne", u shpreh ai, duke theksuar se grupet e reja po rriten dhe përfaqësojnë humusin opozitar që nuk ndihet më i përfaqësuar te PD-ja.
Shehi kritikoi ngërçin opozitar në një kohë kur, sipas tij, Shqipëria ka një qeveri të korruptuar. "Pse në vend që të shkojmë përpara vijmë mbrapsht? Hajde të krijojmë ca kushte që opozita të marrë maksimumin e asaj që është humusi opozitar, që unë besoj që është i madh. Por, nuk përfaqësohet më", deklaroi ai.
Ai pa shpresë te dinamika e re brenda frontit opozitar. "Të tjerët janë të rinj, janë në rritje. Unë këtu e shoh këtë lloj dinamike të re dhe këtu e shoh edhe shpresën. Te ata që mendojnë ndryshe, që po përballen. Edhe gjykoj që një pjesë e qytetarëve do t’i vijë nga mbrapa", shtoi Shehi.
Deklaratat u bënë më 4 shkurt 2026.