Pas shpalljes së aktgjykimit dënues nga Dhomat e Specializuara në Hagë ndaj ish-krerëve të UÇK-së, Daut Haradinaj ka kërkuar një mobilizim të gjerë institucional dhe politik. Përmes një reagimi, ai ka vlerësuar se përballja me këtë proces gjyqësor, të cilin e ka cilësuar si "gjykate politike", kërkon tejkalimin e përplasjeve të përditshme, të cilat i ka konsideruar si politika të brendshme e banale.
Haradinaj ka theksuar se një strategji vetëm në nivel shtetëror nuk është e mjaftueshme në rrethanat aktuale. Ai ka bërë thirrje për ndërtimin e një qasjeje gjithëkombëtare, e cila duhet të përfshijë bashkërendimin me faktorët politikë vendorë, shtetin e Shqipërisë dhe partnerët ndërkombëtarë. Sipas tij, është momenti që politika të lërë anash ndasitë për pushtet dhe të përqendrohet në ndërtimin e një qëndrimi të përbashkët shtetëror.
"Populli është në sheshe. Politika duhet të ulet në tavolinë. URGJENTISHT!", ka shkruar Haradinaj, duke shtuar se diskutimet nuk duhet të zhvillohen për interesa të ngushta apo për ndarje të pushtetit, por për të unifikuar qëndrimet dhe reagimet shtetërore.
Kjo thirrje vjen si pasojë e zhvillimeve të fundit në procesin gjyqësor, me synimin për të shmangur kalimin e përgjegjësive ndërmjet subjekteve politike në një kohë që populli ndodhet në sheshe.