Në prag të finales së Kupës së Botës, trajneri i kombëtares spanjolle, Luis de la Fuente, ka theksuar rëndësinë e përqendrimit në identitetin futbollistik të ekipit. Sipas tij, suksesi varet nga besnikëria ndaj stilit të lojës dhe ruajtja e qetësisë përballë provokimeve të mundshme nga kundërshtari.
"Ne dimë të luajmë futboll, t’i japim kuptim lojës sonë kur e kemi topin, dhe kur nuk e kemi, të jemi të disiplinuar, agresivë dhe ta rimarrim shpejt", u shpreh De la Fuente. Ai theksoi se besimi i ndërsjellë dhe njohja e gjatë mes lojtarëve, shumë prej të cilëve i ka drejtuar që nga ekipet e moshave, mbeten pikat më të forta të ekipit.
Sa i përket gjendjes shëndetësore, trajneri konfirmoi se Lamine Yamal dhe Pedro Porro, të cilët janë stërvitur veçmas ditët e fundit për shkak të problemeve të lehta muskulore, do të jenë në dispozicion për finalen. Ai shprehu besim të plotë te Yamal, duke kërkuar që lojtari të çlirohet nga presioni për të dhënë maksimumin në fushë.
Në lidhje me arbitrimin, De la Fuente deklaroi se gjyqtari slloven Slavko Vinçiç ka përgjegjësinë për të zbatuar rregullat dhe për të parandaluar çdo veprim që kalon kufijtë e etikës sportive gjatë ndeshjes.