Gjatë mbledhjes së Komisionit të Posaçëm për Reformën Zgjedhore, një debat i ashpër u shënua mes deputetit të Partisë Socialiste, Ulsi Manja, dhe atij të Partisë Demokratike, Ivi Kaso. Shkak për acarimin e situatës u bënë ndërhyrjet e përsëritura të Kasos, i cili ndërpreu fjalën e Manjës tri herë gjatë diskutimeve.
Duke kërkuar respektimin e procedurave dhe rendit të ditës, Ulsi Manja iu drejtua Ivi Kasos me tone të ashpra, duke i thënë: "Mbylle gojën, o legen". Në ndërhyrjen e tij, Manja theksoi se çështjet që po diskutoheshin ishin trajtuar më parë dhe shtoi se drejtuesi i SPAK-ut pritet të raportojë mbi luftën kundër kriminalitetit në datën 3 korrik.
Bashkëkryetari i komisionit, Damian Gjiknuri, ndërhyri për të qetësuar situatën, duke u bërë thirrje palëve që ta kthenin mbledhjen në një seancë produktive për dëgjimin e çështjeve lidhur me krimet zgjedhore.