Seanca e sotme plenare u shoqërua me debate të forta mes kreut të Partisë Demokratike, Sali Berisha, dhe kryetarit të Kuvendit, Niko Peleshi, pas kërkesës së mazhorancës për ndryshimin e rendit të ditës.
Gjatë fjalës së tij në sallë, Berisha akuzoi kryeparlamentarin Peleshi për bllokim të amendamenteve të propozuara nga opozita, duke e cilësuar atë si "armik të Kushtetutës" dhe "vasal të kryeministrit Edi Rama". Ish-kryeministri pretendoi se amendamentet për ndryshimin e ligjeve janë dorëzuar prej një muaji dhe janë injoruar, pavarësisht kërkesave nga Bashkimi Evropian, Komisioni Evropian dhe Parlamenti Evropian. Gjithashtu, ai lidhi këto kërkesa me protestat masive që po zhvillohen prej 51 ditësh në vend.
Nga ana e tij, kryetari i Kuvendit Niko Peleshi i kërkoi Berishës të respektojë etikën parlamentare dhe të shmangë gjuhën fyese. Ai theksoi se nuk do të lejojë shkeljen e rregullores së Kuvendit dhe paralajmëroi masa disiplinore për çdo deputet që abuzon me fjalën. Pas këtij komunikimi, kryetari i Kuvendit vendosi t'ia ndërpresë fjalën kreut të Partisë Demokratike.