Deputeti i Aleancës Shqiptare në Kuvendin e Malit të Zi, Ilir Çapuni, ka reaguar ndaj debateve politike mbi vendimin e autoriteteve të Kosovës për t'iu ndaluar hyrjen dy zyrtarëve të lartë malazezë. Çapuni vlerësoi se veprimet e institucioneve të Kosovës duhet të respektohen si vendime të një shteti sovran.
Sipas Çapunit, organet kompetente të Kosovës kanë vlerësuar se ekzistojnë arsye sigurie për masa parandaluese ndaj personave konkretë. Ai theksoi se institucionet e Kosovës kanë vepruar brenda juridiksionit të tyre ligjor, duke nënvizuar se respekti ndaj vendimeve shtetërore duhet të jetë reciprok.
Nga ana tjetër, kryetari i Kuvendit të Malit të Zi, Andrija Mandiq, që udhëheq partinë Nova Srpska Demokratija (NSD), ka deklaruar se pas këtij vendimi qëndron kryeministri i Kosovës, Albin Kurti. Partia e Mandiqit pretendon se ky veprim synon dëmtimin e marrëdhënieve ndërmjet politikanëve serbë dhe shqiptarë në Mal të Zi.
Zyrtarët ndaj të cilëve është raportuar ndalimi i hyrjes janë kryetari i Komunës së Nikshiqit, Marko Kovaçeviq, dhe kryetarja e Kuvendit Komunal të Beranës, Vidi Ivanoviq, të dy anëtarë të partisë NSD. Deri në këtë moment, autoritetet zyrtare në Kosovë nuk kanë konfirmuar ende zyrtarisht këtë vendim.