Një debat i ashpër politik është zhvilluar pas vdekjes tragjike të një punëtori në një vendpunishte në Prishtinë. Alban Krasniqi, bashkëshorti i ushtrueses së detyrës së presidentes Albulena Haxhiu, e ka cilësuar kryetarin e Komunës së Prishtinës, Përparim Rama, si "vrasës" në lidhje me këtë ngjarje.
Kjo akuzë ka sjellë reagimin e ish-deputetit Haki Abazi, i cili e ka drejtuar pyetjen e tij ndaj kryeministrit në detyrë, Albin Kurti. Përmes një postimi në rrjetet sociale, Abazi ka kërkuar sqarime mbi përgjegjësinë e shtetit në rastin e vitit 2022, kur Hamide Magashi, e cila ishte në muajin e nëntë të shtatzënisë, u vra nga bashkëshorti i saj në oborrin e Qendrës Klinike Universitare të Kosovës (QKUK), pavarësisht se ishte nën urdhër mbrojtës.
"Unë e pyes Albin Kurtin kush ka qenë vrasës në rastin e nënës shtatzënë në muajin e nëntë në oborrin e QKUK-së, e që ka qenë në urdhër mbrojtës?", ka shkruar Abazi.
Ai ka theksuar se, ndërsa aksidentet në punë përbëjnë fatkeqësi, kur shteti dështon në mbrojtjen e qytetarëve, ai bëhet pjesëmarrës në vrasje. Sipas Abazit, vrasja e Hamide Magashit dhe foshnjës së saj duhet të trajtohet si një vrasje e kryer nga shteti.