Debati nisi pasi ish-deputeti i Partisë Demokratike, Edmond Spaho, publikoi një mesazh ku kërkonte nga kryeministri Edi Rama të mos dorëhiqet përballë presionit të protestave që po zhvillohen prej 28 ditësh në Tiranë. Sipas Spahos, tërheqja e kreut të qeverisë në këtë moment do të përbënte dëm për rrugën e Shqipërisë drejt Bashkimit Europian, proces për të cilin ai pretendon se vendi është shumë pranë, qoftë për arsye meritokracie apo gjeopolitike.
Reagimi i Beqirajt
Kjo deklaratë shkaktoi reagimin e ish-zv.ministres së Financave, Irena Beqiraj. Ajo kritikoi qëndrimin e ish-deputetit, duke e cilësuar atë si të pakuptimtë dhe kontradiktor me kritikat e tij të hershme ndaj kryeministrit. Beqiraj akuzoi Spahon për mungesë integriteti politik, duke aluduar se ai po ndryshon qëndrim për çështje që dëmtojnë opozitën.
Kundërpërgjigjja e Spahos
Në përgjigjen e tij, Edmond Spaho sqaroi se qëndrimi i tij nuk përfaqëson mbështetje për qeverisjen aktuale. Ai theksoi se mbetet kritik ndaj Edi Ramës për vendimet e së shkuarës, por refuzon që integrimi europian të rrezikohet nga, siç i cilësoi ai, presionet e grupeve të caktuara protestuese.
Spaho hodhi poshtë pretendimet se është pjesë e ndonjë grupimi apo liste politike, duke deklaruar: "Unë nuk jam pjesë e asnjë liste: as e Asamblesë, as e listave të Saliut apo të Edit. Jam i lirë dhe flas sipas bindjes sime".