Dega e Lidhjes Demokratike të Kosovës (LDK) në Rahovec ka kërkuar mbajtjen e zgjedhjeve të përgjithshme brenda partisë, pas një analize të performancës zgjedhore në nivel lokal dhe atë të Republikës së Kosovës.
Në mbledhjen e mbajtur më 26 qershor 2026, Kryesia e degës vendosi unanimisht që partia duhet t’i nënshtrohet një procesi zgjedhor për të gjitha strukturat drejtuese, nga nëndegët deri tek kryetari i LDK-së.
Sipas njoftimit zyrtar, rezultati i arritur në zgjedhjet e 7 qershorit 2026 nuk ka përmbushur pritjet e strukturave dhe aktivistëve. Dega e Rahovecit e ka konsideruar rezultatin si të pamjaftueshëm dhe ka vlerësuar se mbajtja e zgjedhjeve në të gjitha nivelet është hapi i domosdoshëm për reflektim dhe forcim të subjektit.
Sipas Kryesisë, vetëm përmes një procesi gjithëpërfshirës, statutar dhe transparent mund të garantohet forcimi i mëtejshëm i Lidhjes Demokratike të Kosovës.