Trupi gjykues në Gjykatën Speciale ka bërë të ditur se nga 9 deri më 18 shkurt do të zhvillohen deklaratat përmbyllëse në rastin ndaj katër ish-udhëheqësve të Ushtrisë Çlirimtare të Kosovës: Hashim Thaçi, Kadri Veseli, Jakup Krasniqi dhe Rexhep Selimi.
Në këto data pritet të paraqiten fjalët përfundimtare nga përfaqësuesit e prokurorisë, avokatët mbrojtës dhe vetë të akuzuarit. Ata akuzohen për krime lufte gjatë periudhës mars 1998-shtator 1999 në Kosovë, si dhe në Kukës e Cahan të Shqipërisë.
Të akuzuarit janë në paraburgim që nga nëntori i 2020-s. Prokuroria ka mbyllur çështjen më 15 prill, ndërsa mbrojtja e ka përfunduar më 2 dhjetor.
Para këtij përditësimi, deklaratat përmbyllëse ishin planifikuar të mbaheshin nga 9 deri më 13 shkurt, por tani periudha është zgjeruar deri më 18 shkurt për të përfshirë të gjitha pjesët e nevojshme.