Deputetja e Partisë Demokratike të Kosovës (PDK), Blerta Deliu-Kodra, ka shprehur kritika të ashpra ndaj Lëvizjes Vetëvendosje, pas deklarimeve të ministrit në detyrë të Punëve të Jashtme, Glauk Konjufca. Përmes një reagimi në rrjetet sociale, ajo ka akuzuar pushtetin për dëmtim të rendit kushtetues dhe paralizim të institucioneve të Kosovës.
Deliu-Kodra ka renditur një sërë veprimesh që sipas saj përbëjnë rrezik për shtetin, duke përfshirë shkeljen e Kushtetutës, mosrespektimin e vendimeve të Gjykatës Kushtetuese dhe shpërfilljen e Rregullores së Kuvendit. Ajo theksoi se këto zhvillime, të cilat sipas saj janë kryer brenda një muaji, po ndikojnë negativisht në funksionimin institucional.
"Çka duhet të bëjë një armik i Kosovës për ta dëmtuar shtetin më shumë? Të shkelë Kushtetutën? Të shpërfillë Gjykatën Kushtetuese? Të paralizojë Kuvendin? Të mos respektojë Rregulloren e tij?", shkroi deputetja.
Ajo shtoi se pas skadimit të afatit prej 48 orësh, është prekur edhe Rregullorja e Kuvendit. "Kur shkelen Kushtetuta, vendimet e Gjykatës dhe rregullat e Kuvendit, nuk po dëmtohet vetëm një institucion. Po dëmtohet vetë rendi kushtetues. E kur rrënohen rregullat, rrënohen edhe themelet mbi të cilat qëndron shteti", ka deklaruar Deliu-Kodra.