Ervin Demo, ministër i Shtetit për Pushtetin Vendor, deklaroi se Paketa e Maleve nuk sjell konflikte në komunitet. Ai foli gjatë një takimi me përfaqësues të agroturizmit në Tiranë, ku ishte i pranishëm edhe kryeministri Edi Rama.
Ministri nënvizoi se 36 bashki kanë miratuar 304 zona prioritare për zhvillim, ndërsa procesi vazhdon në bashkitë e tjera. Pas miratimit, hartat do publikohen në platformën e-Albania, në një seksion të dedikuar. Kjo transparencë lejon verifikimin vizual nga qytetarët dhe shmangien e konflikteve mes banorëve apo investitorëve.
Bashkitë luajnë rol thelbësor duke përcaktuar zonat prioritare dhe duke ndjekur procedurat e verifikimit në terren. Përfitues mund të jenë individët që zotërojnë toka të pashpërndara sipas ligjit 7501, por të përdorura historikisht nga familjet për bujqësi. Kush ka trashëguar tokë nga të parët, gëzon prioritet në investime.
Në Bashkinë e Tiranës janë regjistruar mbi 600 shprehje interesi paraprak, jo ende aplikime zyrtare. Pas shpalljes publike të zonave, sipërmarrësit e vegjël dhe të mesëm mund të zhvillojnë pronat. Paketa synon rijetësimin e zonave rurale, zhvillimin e ekonomisë lokale dhe dhënien e arsyeve për qëndrimin e banorëve atje.
Demo theksoi rëndësinë e kësaj nisme për sipërmarrësit që kanë shënuar suksese në disa zona.