Ish-ministri britanik, Denis Macshane, i cili ka shërbyer në qeverinë e Tony Blair, mori pjesë në konferencën “Urat e Kujtimit”, organizuar nga organizatat “Liria ka Emër” dhe KIPRED. Gjatë fjalës së tij, ai u përqendrua te procesi gjyqësor ndaj Hashim Thaçit në Dhomat e Posaçme në Hagë.
Macshane e vlerësoi Thaçin si një nga arkitektët më të suksesshëm të komunikimit politik gjatë luftës, duke theksuar se ai arriti të bindte median ndërkombëtare dhe sekretaren amerikane të Shtetit, Madeleine Albright, për të refuzuar propagandën e regjimit të Millosheviqit. Ai kujtoi se Thaçi u dorëzua vullnetarisht para drejtësisë ndërkombëtare në nëntor të vitit 2020.
Duke komentuar zhvillimet aktuale, ish-ministri shprehu kritika ndaj disa qarqeve perëndimore, të cilat sipas tij kanë pasur shpresa naive se udhëheqësit kosovarë mund të viheshin në të njëjtin plan moral e juridik me skuadrat vdekjeprurëse të regjimit të Millosheviqit. Macshane pohoi se deri më sot nuk është paraqitur asnjë dëshmi bindëse ose e besueshme që do të çonte në dënimin e ish-presidentit të Kosovës.
Në përfundim, ai kritikoi investimin e tepërt te gjykatat ndërkombëtare si mjet për pajtim, duke paralajmëruar se Kosova rrezikon të mbetet një shtet i cunguar për sa kohë Bashkimi Evropian toleron fiksionin se njohja e saj e plotë nuk është e domosdoshme.