Një qytetar nga Vlora ka publikuar një video-mesazh, në të cilin përshkruan incidentin e ndodhur gjatë protestës për çështje pronësie në Zvërnec. Në dëshminë e tij, ai pretendon se është tërhequr zvarrë nga roje private, të cilët më pas e kanë futur në një automjet dhe e kanë kërcënuar duke i drejtuar pistoletën në kokë.
Sipas qytetarit, ndërhyrja e Policisë së Shtetit ka qenë vendimtare për shpëtimin e tij dhe kthimin mes protestuesve të tjerë. Ai deklaroi se ka pësuar dëmtime fizike në zonën e grykës, të cilat i kanë shkaktuar vështirësi në frymëmarrje dhe hemoragji, si pasojë e goditjeve të marra.
Në deklaratën e tij, qytetari ngriti shqetësimin mbi përplasjet mes rojeve private dhe forcave të rendit, duke pretenduar se punonjësit e sigurisë private kanë përdorur gaz lotsjellës ndaj policisë. Ai theksoi se protesta është zhvilluar për mbrojtjen e pronave të trashëguara brez pas brezi.
Lidhur me ngjarjen, qytetari ka bërë një kallëzim zyrtar në Prokurorinë e Vlorës, duke kërkuar zbardhjen e rrethanave dhe identifikimin e përgjegjësve. Ai nënvizoi se nuk është i përfshirë në aktivitete politike dhe se kërkesa e tij është njohja e pronës së ligjshme.