Deputetja e Partisë Demokratike të Kosovës, Ariana Musliu-Shoshi, ka bërë të ditur vazhdimin e protestave në shesh, duke shënuar kështu natën e 11-të me radhë që nga shpallja e aktgjykimit nga ana e Gjykatës Speciale. Në këto tubime, Musliu-Shoshi u pa krah për krah me bashkëpartiakët e saj, përfshirë Enver Hoxhajn dhe Ardian Kastratin, duke u takuar me qytetarë që kanë dalë për të shprehur pakënaqësinë ndaj vendimit të gjykatës, të cilin e konsiderojnë të padrejtë ndaj ish-krerëve të UÇK-së.
Në një mesazh të publikuar në rrjetet sociale, deputetja theksoi se prezenca e saj në shesh do të jetë e përditshme. “Këtu jemi. Sonte e çdo natë. Për drejtësi, për historinë tonë, për çlirimtarët tanë. Deri në lirimin e tyre!”, ka shkruar Musliu-Shoshi. Protestat kanë nisur pas vendimit të Gjykatës Speciale dhe po zhvillohen vazhdimisht si formë e kërkesës për drejtësi dhe mbështetje për të akuzuarit.