Në fundjavë zhvillohet derbi mes Prishtinës dhe Ballkanit në kuadër të xhiros së 26-të të Superligës së futbollit të Kosovës.
Klubi Prishtina ka njoftuar se ndeshja nuk do të luhet në stadiumin Fadil Vokrri, si zakonisht, por në kampin nacional në Hajvali, duke filluar nga ora 13:00 të së shtunës.
Pjesa e dytë e marsit është rezervuar për Kombëtaren e Kosovës. Federata e Futbollit të Kosovës ka vendosur ta ruajë fushën e Fadil Vokrri për finalen eventuale të play-off-it të Botërorit 2026, ku Kosova synon të kualifikohet.
Kombëtarja së pari luan gjysmëfinalen e play-off-it me Sllovakinë në udhëtim më 26 mars. Nëse kalon, do të presë në finale më 31 mars në Fadil Vokrri kundërshtarin mes Turqisë ose Rumanisë.
Zakonisht, afër ndeshjeve të kombëtares, stadiumi i kryeqytetit nuk lejohet të përdoret nga klubet për të mbajtur fushën në gjendje optimale.