Pas ngjarjes së rëndë të ndodhur tre ditë më parë në Roskovec, Rozalinda Plaka ka rrëfyer detajet e lidhjes së saj me 35-vjeçarin Refit Buzi dhe momentet e përballjes me krimin. Sipas dëshmisë së saj, fejesa ishte lidhur në vitin 2020, por marrëdhënia u përkeqësua për shkak të stilit të jetesës së Buzit, duke e detyruar atë të kërkonte ndarjen në vitin 2024. Prindërit e saj, Kosta Plaka dhe bashkëshortja, nuk e kishin mbështetur lidhjen që në fillim.
Natën e krimit, e reja dëgjoi një zhurmë që i ngjau të shtënës së një arme gjahu. Kur doli në korridorin e banesës, ajo gjeti babanë e saj të shtrirë përmbys dhe të mbuluar me gjak, ndërsa autori ndodhej aty me një armë të gjatë në dorë. Ajo tentoi të ndërhynte për t'ia marrë armën, por u dhunua nga Buzi, i cili e mori me forcë nga banesa dhe e mbajti peng në një automjet për disa orë. Gjatë përplasjes, ajo pësoi lëndime nga copat e xhamit.
Në dëshminë e saj, Plaka theksoi gjendjen e tronditjes së thellë gjatë marrjes me forcë. Gjatë negociatave të autorit me policinë, u vu re se ai ishte zbathur. Kur u pyet nga prokurori për këtë detaj, Buzi deklaroi se këpucët ia kishte dhënë ish-të fejuarës së tij, pasi e kishte marrë atë zbathur nga banesa.
Ndërkohë, prindërit e autorit kanë pretenduar se motivi i konfliktit lidhet me shuma parash që djali i tyre kishte dërguar nga Anglia gjatë periudhës së fejesës, të cilat 24-vjeçarja dyshohet se nuk pranoi t'i kthente pas prishjes së lidhjes. Policia dhe prokuroria vijojnë hetimet për zbardhjen e plotë të rrethanave të kësaj tragjedie që la pas tre viktima.