Shpend Hasanramaj humbi jetën në një ngjarje të rëndë të ndodhur të enjten në Bjeshkët e Strellcit, në komunën e Deçanit. Autoritetet policore, nëpërmjet zëdhënësit për rajonin e Pejës, Driton Rugova, konfirmuan se dyshimet fillestare tregojnë se viktima u qëllua aksidentalisht nga i biri, Erdonit Hasanramaj, gjatë qëndrimit në bjeshkë.
Në lidhje me këtë rast, Policia e Kosovës ndërmori veprimet procedurale, duke vënë në pranga të dyshuarin dhe duke sekuestruar armën e zjarrit që dyshohet se është përdorur në incident. Organet e rendit vijojnë hetimet për zbardhjen e plotë të rrethanave në të cilat ndodhi ngjarja.
Familja e viktimës ka njoftuar se lamtumira e fundit për Shpend Hasanramajn do të jepet ditën e shtunë, më 25 korrik. Ceremonia e varrimit do të zhvillohet në orën 13:00, në varrezat e fshatit Strellc i Epërm, në afërsi të xhamisë së zonës.