Detaje të reja janë zbardhur lidhur me vrasjen e rëndë që ndodhi mbrëmjen e së dielës në lagjen Kolonia të qytetit të Gjakovës, ku një i ri humbi jetën pas një konflikti mes dy grupeve familjare.
Policia e Kosovës ndërhyri në rrugën "Ali Ibra" pas njoftimeve për një përleshje fizike. Sipas informacioneve të siguruara, në ngjarje kanë qenë të përfshirë: Ilir Sofra, Floreta Hadri, L.K., Sehar Gashi, Senad Gashi dhe Egzon Gashi.
Sipas hetimeve fillestare, gjatë konfliktit, i dyshuari Ilir Sofra dyshohet se ka përdorur një mjet të mprehtë për të goditur viktimën B.G., i lindur në vitin 2008. Për shkak të plagëve të rënda, viktima ka ndërruar jetë.
Në raportin policor thuhet se, përveç viktimës, lëndime kanë pësuar edhe vetë i dyshuari Ilir Sofra dhe një person tjetër i përfshirë në konflikt, të cilët janë duke marrë trajtim mjekësor. Mjeti i mprehtë i përdorur në këtë ngjarje ende nuk është gjetur nga autoritetet.
Me urdhër të prokurorit për krime të rënda, rasti është iniciuar si "Vrasje e rëndë", ndërsa trupi i pajetë është dërguar në Institutin e Mjekësisë Ligjore për kryerjen e obduksionit. Hetimet nga organet përkatëse janë në vazhdim.