Ngjarja e rëndë në Ksamil, ku humbi jetën Luis Miguel Varela Mendes, ka tronditur komunitetin në Nicë të Francës, ku i riu ishte rritur prej moshës 11-vjeçare. Sipas të dhënave, viktima, i njohur me nofkën “Milton”, ishte i përfshirë në qendrën sociale La Ruche dhe njihej për rolin e tij ndërmjetësues në konflikte. Grupi i të rinjve kishte planifikuar një udhëtim për në Spanjë më 26 gusht në kuadër të programit “Sac à dos”, por vendosën të udhëtonin drejt Shqipërisë me mjetet e tyre për shkak të vonesave në organizim, pavarësisht këshillave të edukatorëve për të mos e ndërmarrë këtë udhëtim.
Lidhur me hetimet, Gjykata ka caktuar masën e sigurisë “arrest me burg” për autorin e dyshuar Sokrat Vata, i cili ka shprehur pendesë. Gjithashtu, burg pa afat është caktuar për dy shtetasit turq, Ezgi Parlak dhe Nuh Mahmutoglu, për tentativë për të fshehur autorin. Tre kamerierë të kompleksit, Ildi Cekani, Serxhi Selimi dhe Ervis Bunci, janë lënë në burg për 45 ditë, ndërsa truprojat Luciano Seferi, Moisid Matushaj, Romeo Shehu, Kristo Kosho dhe kamerieri Murat Zhabina janë në detyrim paraqitjeje. Autoritetet janë ende në kërkim të pronarit të resortit Bekim Bulica dhe punonjësit David Heurtevent.
Shoqatat La Semeuse dhe Dix Étoiles po ofrojnë mbështetje për familjen e viktimës, e cila përballet me vështirësi ekonomike pas shkatërrimit të banesës së tyre nga një zjarr. Përmes një llogarie të hapur për mbledhje fondesh, janë grumbulluar mbi 6,300 euro për të ndihmuar në riatdhesimin e trupit dhe përballimin e shpenzimeve të procesit gjyqësor.