Pretendimet e publikuara nga mediumi rus Sputnik në gjuhën serbe, të cilat u pasuan nga Vaseljenska.net, përpiqen të ndërlidhin përplasjet mes protestuesve dhe policisë në Tiranë me vendimin e Dhomave të Specializuara të Kosovës në Hagë ndaj Hashim Thaçit, Kadri Veselit, Rexhep Selimit dhe Jakup Krasniqit. Sipas këtyre artikujve, protestat u zhvilluan për shkak të aktgjykimit të gjykatës ndërkombëtare.
Sipas hulumtimit nga hibrid.info, faktet tregojnë të kundërtën. Protesta e 17 shtatorit ishte pjesë e një serie tubimesh të vazhdueshme që kishin nisur rreth 110 ditë më parë, me kërkesë kryesore dorëheqjen e kryeministrit Edi Rama. Raportimet nga mediat vendase, si Reporter.al, BalkanWeb dhe Shqiptarja.com, konfirmojnë se tensionet mes protestuesve dhe forcave të rendit u shkaktuan nga përpjekjet për të thyer kordonin e policisë pranë Ministrisë së Brendshme dhe Kuvendit, gjatë protestës kundër klasës politike.
Në të njëjtën ditë, Kuvendi i Shqipërisë miratoi një deklaratë zyrtare përmes së cilës shprehu mospajtimin me vendimin e gjykatës në Hagë dhe angazhimin për bashkërendim me institucionet e Kosovës. Kryetari i Kuvendit, Niko Peleshi, e lexoi këtë deklaratë në seancë plenare, por ky zhvillim parlamentar ishte një proces i ndarë nga protesta antiqeveritare që po zhvillohej jashtë institucionit. Ndërsa më 16 shtator, ditën e shpalljes së vendimit, pati solidarizim të qytetarëve me ish-krerët e UÇK-së përmes thirrjeve, raportimet e Euronews Albania sqarojnë se këto ishin raste të veçuara nga ngjarjet e tensionuara të datës 17 shtator.