Në një poligon të acartë në lindje të Ukrainës, dhjetëra gra të dënuara po përgatiten për misione me dronë në vijat e frontit. Ato janë liruar nga burgu për të shërbyer në batalionin Shkval, njësi ushtarake e përbërë nga të dënuar në kuadër të Brigadës së 59-të të Ushtrisë ukrainase.
Njëra prej tyre, me nofkën Kupo, drejton një kuadkopter, duke e ulur në tokë para se një grua tjetër ta ngrinte sërish mbi pemë. Ajo shpjegon se për vite të tëra ka tentuar të hyjë në ushtri. Që nga viti 2023 ka aplikuar kudo, por 46 brigada e kanë refuzuar, sepse as atëherë nuk pranonin gra të dënuara.
Rekrutuesit e batalionit Shkval erdhën në burgun ku Kupo vuante dënimin. Ata përjashtuan të paaftët fizikisht, ata me varësi nga droga si dhe kryerësit e krimeve të rënda, si përdhunimi apo vrasjet e shumta. Afër 100 gra pranuan vullnetarisht të shërbejnë, por vetëm afër 20 u zgjodhën. Shumë të tjera ende presin.
Kupo u dënua në moshën 23-vjeçare për arsye që nuk deshi t'i përmendte. Pas pesë vjetësh në burg, ajo vendosi të mos humbasë më kohë. "Nuk ka kuptim vetëm të rrish në burg. Duhet të jesh i dobishëm. Mendoj se mund të jap kontributin tim të vogël për një fitore të madhe. Gjithçka do të jetë në rregull, edhe në rastin më të keq", thotë ajo.
Sipas kushteve të lirimit, Kupo dhe të tjerat rifitojnë lirinë nëse shërbejnë deri në fund të luftës me Rusinë. Megjithatë, detyrat me rrezik të lartë në pjesët më të rrezikshme të frontit mund të mos i lejojnë të gjitha të mbijetojnë kaq gjatë. Gratë në poligon stërviten kryesisht për operacione zbulimi, që janë më pak të rrezikshme.