Dëshmia e Genti Nelës ka zbardhur dinamikën e konfliktit të ndodhur më 27 gusht 2026 në hotelin FLAR, ku ai punonte si banakier. Sipas deklaratës së tij, dhuna nisi kur ai kërkoi pagën pasi kishte vendosur të largohej nga puna. Në momentin e kërkesës, të pranishëm kanë qenë bashkëpronarët Florian Habilaj e Arbër Habilaj, si dhe Enold Dragoti dhe Mariglen Mosha.
Sipas 18-vjeçarit, Florian Habilaj e ka goditur fillimisht me grusht, ndërsa Arbër Habilaj e ka goditur me një tavëll qelqi në kokë dhe fytyrë. Enold Dragoti ka marrë pjesë gjithashtu në dhunim, ndërsa Mariglen Mosha e ka mbajtur të riun për ta penguar të largohej. Kamerieri është shprehur se është kërcënuar me vdekje gjatë gjithë kohës. Për t'u mbrojtur, Nela ka goditur Florian Habilajn me një gotë qelqi dhe ka arritur të largohet përkohësisht, përpara se të ndiqej dhe të dhunohej sërish nga të katër personat.
Ngjarja është dokumentuar pjesërisht nga një video e filmuar nga dëshmitarë në vendngjarje, pasi autorët kishin fshirë pamjet e kamerave të sigurisë. Pas agresionit, xhaxhai i 18-vjeçarit, Melison Nela, u ndalua nga policia teksa po shkonte drejt hotelit, ku iu gjet një kallashnikov, tre karikatorë dhe 84 fishekë. Prokuroria i akuzon të arrestuarit për veprën penale "plagosje e rëndë me dashje".