Skuadra e Dinamo City arriti një fitore të thellë në ndeshjen e kthimit përballë letonezëve të Auda në stadiumin “Elbasan Arena”, duke siguruar kalimin për në fazën play-off të Conference League. Takimi u mbyll me shifrat 4-0, duke përmbysur disavantazhin e ndeshjes së parë që përfundoi me humbjen 1-0 për kryeqytetasit.
Serinë e golave e hapi Eridon Qardaku në minutën e 36-të me një goditje nga distanca. Pak para fundit të pjesës së parë, në minutën e 45-të, Klevi Qefalia dyfishoi rezultatin pas një aksioni me Qardakun. Ritmi i lartë i skuadrës së Ilir Dajës vijoi edhe në pjesën e dytë, ku Malomo Ayodeji shënoi golin e tretë në minutën e 51-të pas asistimit të Ruben Richards. Rezultati përfundimtar u vulos nga David Fadairo.
Me këtë sukses, Dinamo City kualifikohet për herë të dytë në historinë e klubit në fazën play-off të këtij kompeticioni. Në raundin e ardhshëm, ekipi shqiptar do të përballet me skuadrën e Pafos.