Java e 18-të e kampionatit Abissnet Superiore përmbylli edicionin për vitin 2025, ndërsa garat do të rifillojnë më 14 janar me ndeshjet e javës së 19-të.
Kampionatin e udhëheq skuadra Egnatia me 37 pikë, por ekipi me sulmin më të fortë deri tani është Dinamo City, që ka shënuar 27 gola në 18 javë. Kjo shifër është tre gola më shumë se ajo e Vllaznia-së dhe katër më shumë se e Egnatia-së. Sulmuesi kryesor i Dinamo City është Dejvi Bregu, me shtatë gola të realizuar, duke u bërë pikë kyçe në repartin ofensiv të skuadrës.
Në aspektin mbrojtës, Egnatia dhe AF Elbasani dallohen si skuadrat që kanë pësuar më pak gola, vetëm 11 secila në 18 ndeshje. Pas tyre renditet Dinamo City me 12 gola të pranuar. Egnatia ka arritur 11 fitore, 4 barazime dhe vetëm 3 humbje, duke qenë skuadra me më shumë suksese në kampionat. Ndërkohë, Dinamo City regjistroi fitoren më të thellë të sezonit, me rezultat 6-2 kundër Tiranës.
Krahasimi me sezonin e kaluar
Performanca e skuadrave krahasohet me sezonin 2024-2025 pas të njëjtit numri javësh. Në atë edicion, Dinamo City dhe Vllaznia kryenin me nga 31 pikë, ndërsa Egnatia kishte 30 pikë. Këtë sezon, Egnatia ka rritje të dukshme me 7 pikë më shumë, Dinamo City ka 32 pikë (një më shumë), ndërsa Vllaznia ka 30 pikë (një më pak).
Ecuria më e spikatur i takon AF Elbasanit, që ka kaluar nga 22 pikë në 33 pikë, duke u bërë pretendente serioze për titull. Teuta ka përmirësuar nga 22 në 25 pikë, ndërsa Partizani ka rënë nga 30 në 23 pikë. Bylisi ka një pikë më shumë, por Tirana ka pësuar ulje të madhe, nga 18 në 10 pikë.
Skuadrat e ngjitura nga Kategoria e Parë, Vora ka 19 pikë, ndërsa Flamurtari ka 14 pikë.