Ditën e sotme, qytetarët vijuan rezistencën e tyre në ditën e 101-të të protestave kundër qeverisë në Tiranë. Tubimi nisi rreth orës 17:00 para godinës së Kuvendit, në kohën kur po zhvillohej seanca e parë plenare e sesionit të ri parlamentar. Protestuesit u pozicionuan në disa pika në qendër të kryeqytetit, përfshirë hapësirën mes Bulevardit dhe godinës së Parlamentit.
Gjatë protestës u shënuan tensione dhe përplasje me efektivët e Policisë së Shtetit, të cilët kishin rrethuar perimetrin e institucionit. Disa qytetarë u shoqëruan nga forcat e rendit, ndërsa numri i saktë i tyre mbeti i pasigurt, me disa burime që raportojnë për dy të shoqëruar. Grupe të protestuesve hodhën vezë në drejtim të deputetëve që hynin në ambientet e Kuvendit.
Thirrjet kryesore u fokusuan te dorëheqja e kryeministrit Edi Rama dhe kërkesa drejtuar SPAK për arrestimin e tij dhe të ministres Belinda Balluku. Pjesëmarrësit përdorën slogane si “Arrestoni Ramën!” dhe “Polici, këtu na ke, ti mbron krimin dhe jo ne!”. Pas qëndrimit para Kuvendit, qytetarët ndërmorën një marshim në rrugët e kryeqytetit drejt Kryeministrisë.
Kjo lëvizje qytetare, e njohur edhe si “Revolucioni Flamingo”, nisi më 31 maj si reagim kundër ndikimit mjedisor të projektit turistik në Zvërnec. Aktualisht, pjesëmarrësit kërkojnë ndryshime politike dhe institucionale, duke shprehur shqetësimet për korrupsionin, mundësitë e punësimit dhe largimin e të rinjve nga vendi. Aktivistët kanë paralajmëruar vijimin dhe përshkallëzimin e aksionit qytetar në ditët në vijim.
Përditësime
Policia e Shtetit konfirmoi se numri i personave të shoqëruar pas protestës ka arritur në 20. Mes të liruarve pas verifikimeve është edhe gazetari Shpend Gashi dhe disa protestues të tjerë. Marshimi përfundoi në kryqëzimin e 21 Dhjetorit, pasi protestuesit kaluan përmes zonës së ish-Bllokut dhe urës së Vasil Shantos. Aktivisti Arben Kola u bëri thirrje mbështetësve të vazhdojnë tubimet nesër, në sheshin Skënderbej.
Qytetarët po grumbullohen para Komisariatit numër 6 në mbështetje të protestuesve që vazhdojnë të mbahen të ndaluar nga autoritetet. Një grup protestuesish po qëndrojnë jashtë komisariateve të tjera, duke kërkuar lirimin e menjëhershëm të të shoqëruarve. Gjatë marshimit, aktivistët bllokuan përkohësisht akse kryesore, duke përfshirë kryqëzimin te Vasil Shanto dhe perimetrin përreth Drejtorisë së Policisë së Tiranës.
Policia e Shtetit konfirmoi se mes personave të shoqëruar gjatë protestës së djeshme është edhe Adriatik Lapaj, kreu i lëvizjes 'Shqipëria Bëhet'. Ndërkohë, organizatorët kanë zyrtarizuar vijimin e aksionit qytetar me protestën e radhës, e cila do të zhvillohet ditën e 102-të para Kryeministrisë.