Protestat e përditshme para godinës së Kryeministrisë kanë hyrë në ditën e 42-të. Siç është bërë traditë, qytetarët janë grumbulluar fillimisht në sheshin “Skënderbej”, për të marshuar më pas përgjatë bulevardit “Dëshmorët e Kombit”.
Kërkesat e protestuesve mbeten të pandryshuara: dorëheqja e kryeministrit Edi Rama, krijimi i një qeverie teknike dhe largimi i klasës aktuale politike. Protesta e ditës së sotme, e datës 11 korrik, është shpallur nga organizatorët si një protestë kombëtare, ku janë mbajtur fjalime dhe janë bërë thirrje për pjesëmarrje në rrugët e kryeqytetit.
Një propozim i ri është artikuluar nga organizatorët për tubimin e radhës më datë 23 korrik. Është sugjeruar që protesta të zhvillohet paradite, me një marshim që do të nisë në orën 08:30 nga sheshi “Skënderbej” drejt godinës së Parlamentit.