Në Beograd, më 17 mars, u mbajt një protestë e organizuar nga 13 parti dhe lëvizje të së djathtës serbe, përfshirë grupin ultradjathtist Obraz. Slogan i tubimit ishte “Për Kosovën dhe Metohinë serbe”.
Shkak për protestën ishte Ligji për të huajt dhe Ligji për automjetet, të cilët hynë në fuqi në Kosovë më 15 mars. Protestuesit deklaruan se këto ligje ndikojnë negativisht tek minoriteti serb në Kosovë, si dhe tek shëndetësia dhe arsimi në zonat e banuara nga serbët, që funksionojnë sipas sistemit të Serbisë.
Sipas gazetarëve të Radios Evropa e Lirë, qindra persona u mblodhën pranë Presidencës së Serbisë në qendër të Beogradit. Pas fjalimeve, ata nisën një marsh drejt Ambasadës së Federatës Ruse, për të falënderuar Kremlinin, i cili nuk e njeh pavarësinë e Kosovës. Rreth 200 të pranishëm valëvitën flamuj të Serbisë dhe flamuj me portretin e presidentit rus Vladimir Putin. Nga altoparlantët u transmetuan këngë nacionaliste, ndërsa turma brohoriti “Kosovën nuk e dorëzojmë” dhe “Tradhti”.
Midis pjesëmarrësve ishte deputeti i Parlamentit të Serbisë, Branimir Nestoroviq, nga partia opozitare “Ne, zëri i popullit”.
Gjatë protestës foli profesori Slobodan Samarxhiq i Fakultetit të Shkencave Politike në Beograd. Ai tha se autoritetet serbe kanë lënë pas dore shëndetësinë dhe arsimin në veri të Kosovës. “Atje dhuna është e përditshme, njerëzit vuajnë, nuk kanë paratë e tyre. Atje është larguar çdo gjë serbe që mund të hiqej. Dhe tani po përfundojmë me institucionet e arsimit dhe shëndetësisë”, pretendoi Samarxhiq.
Qeveria e Kosovës ka parashikuar lehtësira për komunitetin serb, duke lëshuar leje të përkohshme qëndrimi për 12 muaj për ata që nuk kanë dokumente kosovare dhe duke njohur letërnjoftimet e tyre.