Dogana e Kosovës ka njoftuar se në Pikëkalimin Kufitar Merdare, më 4 prill 2026, ka konfiskuar mallra të padeklaruara në vlerë rreth 10 mijë euro.
Një autobus i linjës ndërkombëtare u paraqit në kufi. Gjatë procedurave fillestare të kontrollit, zyrtarët doganorë e pyetën drejtuesin e automjetit nëse kishte mallra për të deklaruar, por ai u përgjigj negativisht.
Në bashkëpunim me Policinë e Kosovës, automjeti u selektua për kontroll të vijës së dytë dhe u dërgua në hapësira për kontroll të detajuar. Atje, në pjesën e motorit dhe në hapësirën e tualetit, u zbuluan tri pako me cigare elektronike në sasi prej 500 copësh.
Dogana ka ndërmarrë veprimet përkatëse duke ndaluar përkohësisht mallin deri në përfundimin e procedurave administrative. Dogana e Kosovës thekson përkushtimin për zbatimin e ligjit dhe parandalimin e veprimtarive të kundërligjshme në kufi.